焦媛與高皓正將再演音樂劇《野玫瑰之戀》，高皓正更大爆有次綵排時高志森探班畀意見，結果與焦媛意見不合，現場即時充滿火藥味，令他感到相當尷尬，惟有扮睇劇本裝作若無其事。
焦媛再孖高皓正上舞台，第三度演出音樂劇《野玫瑰之戀》，二人十分有默契，今次移師演藝學院演出，更具挑戰性。焦媛說：「會加插好多新元素，布景燈光都會做得更好。」由於是第三次合作，兩人演激情戲時亦不會尷尬，她說：「可以再激啲嘅。」高皓正亦謂可以再放一點，他說：「同焦媛已無最初時咁拘謹，可以放心啲去演，更加投入。」
導演打圓場
由於高皓正與焦媛男友高志森在片場同被稱「高生」，令現場不時發生尷尬場面。問高皓正會否覺得不方便，他笑說：「都唔會嘅，人哋嘅兒女私情我唔理。」但他表示高志森亦會到場睇綵排，更會以前輩身份教路和畀意見，故很感激對方。不過，他說：「有次佢提出意見，焦媛又唔太認同，結果兩人爭持不下，令現場相當有火藥味，搞到我好尷尬，我惟有扮睇劇本當無事發生，通常遇到呢啲情況導演會出嚟打圓場。」
不方便插嘴
事後焦媛表示：「工作還工作，我都會有自己意見，我話晒都係今次嘅藝術總監，同埋個劇係由焦媛實驗劇團製作，我都會有我嘅意見囉。」高皓正笑言他們都是舞台劇的表表者，自己只是小演員，當然不會插嘴。《野》劇將於九月三十日到十月四日演出七場，稍後更有機會到美、加等地巡迴演出。
文：影視組