子珊自入行以來緋聞實在不多，記憶中曾與馬國明因戲中一場人工呼吸的鏡頭而鬧出戲假情真，劇集播完緋聞亦不了了之。而另一件緋聞是與金句天王黎明拍廣告時傳出，雖然兩件緋聞可信性甚低，但除此之外子珊的緋聞亦僅是如此。

對於拍拖兩字，子珊沒有刻意多想，因工作已堆滿她的時間表：「依家眼前最緊要係唱片嘅事，唱片宣傳完咗，又要開始拍劇，仲邊有咁多心神去拍拖！（多年嚟缺乏愛情滋潤好Dry喎？）可能我冇心去諗，反而好輕鬆冇乜嘢啦！」

一定唔揀圈中人

子珊坦言工作環境關係，認識新朋友機會不多，身邊的異性朋友年紀與她相若，而男士的思想和年齡往往都不成正比，她笑言：「我唔想拍拖似湊仔咁，要照顧番佢轉頭呢！所以，不如將心思放喺事業上。」對於擇偶條件，子珊稱首要是思想比她成熟，其次一定不能是圈中人，她謂：「唔好同一個圈啦，我想喺佢身上學到唔同嘅嘢，所以要結婚都會揀圈外人。」

婚後做全職太太

雖然子珊給人事業型感覺，不過，她將來決定結婚，必定會退出，專心做「太太」一職。最希望幾多歲嫁人？子珊笑言：「我又唔會定期限喎，我從來做嘢都冇定過計劃，好似冇諗過選美，又去咗選美，冇諗過拍戲同唱歌，點知又做咗，我鍾意自然咁發生，人生先有驚喜。」

服裝：Sonia by Sonia Rykiel

化妝：Omixb

髮型：Deil@hair cwb

文：音樂組

攝：沈健程