最多拗撬：曾志偉

「大家都好尊重佢，佢對節目好嚴格，一定要有新嘢，一定要拗先OK！好在佢又好接受意見。」

最怕最敬畏：汪明荃

「我好怕亦好敬畏佢，佢講嘅嘢好有point，佢永遠準時綵排，有人遲到，佢會話：『點解叫我六點鐘到！』」

最開心：沈殿霞

「同佢合作真係好開心，做《歡樂滿東華》年年佢都會帶個打邊爐嘅煲返嚟，阿姐、志偉、嘟姐又會帶魚蛋、水餃咁一齊食，好後悔嗰陣冇影到相。」

最死黨：鄭伊健

「我同伊健耐唔耐都會去日本潛水、旅行，佢冇拍拖時，啲雜誌寫佢好寂寞，其實我喺佢隔籬，不過張相次次都cut咗我。」

最佩服：陳志雲

「喺佢身上學到好多嘢，特別係EQ同口才，佢好開通，唔係個好嚴肅嘅老闆。」