前晚，劉嘉玲、狄波拉與夫婿、謝婷婷、安志杰及應屆港姐等，出席「第五屆善學善行耀中華慈善晚宴」，當中以一襲金色開胸性感晚裝上陣的劉嘉玲，艷壓全場。而嘉玲透露近日剛完成徐克的新戲拍攝，並將接拍新戲，對於林青霞傳復出一事，嘉玲表示不知情，揚言希望與對方合作。

感情昇華冇晒激情

而問到嘉玲緊接拍新戲，會否影響她與梁朝偉的生仔大計？嘉玲答道：「乜做嘢唔可以生仔㗎咩，如果好彩有咗嘅話咪停工囉。（係咪冇乜機會二人世界？）我哋咁耐感情，唔使成日黐住一齊，我哋已經去到另一階段，依家更實在，激情肯定冇，換嚟更加關心對方。（偉仔隻手好番未？）佢隻手已經好番，就嚟開工。（會唔會叫佢小心啲？）有呀，樣樣都小心。」

拉姑與鬍鬚Kong出席，婷婷爆媽咪視安志杰如半個仔。	婷婷與安志杰十指緊扣到場大晒恩愛，更情不自禁錫錫。	放大圖片

婷婷安志杰好癡纏

而謝婷婷與安志杰十指緊扣到場，期間二人雖然分開接受訪問，不過安志杰不時情深款款望着婷婷，認真癡纏，事後婷婷甜到漏表示：「好多朋友見到我哋拖住、攬住，都會問我哋係咪好耐冇見，其實冇見半日都好掛住大家。（係咪熱戀期？）佢係我香港best friend，佢好就我。（佢嘅視線不斷望住你？）我都唔知點解，但如果一間房裏面，我都覺得佢係最突出。（過咗拉姑嗰關未？）一早過咗，媽咪一見到佢就搣佢塊面錫，佢好純、唔識講嘢、怕醜，而且好照顧我。」在訪問後，安志杰更情不自禁向婷婷索吻，十分恩愛。

文：影視組