新婚的楊千前晚春風滿面出席時裝騷，心廣體胖的她否認懷孕，並強調現以事業為重，最快明年才擺酒。而老公丁子高因感冒消瘦五磅，還透露將搬回老家上海發展，兩公婆將面臨分隔異地。
前晚千嬅以嘉賓身份出席《Max Mara 2009秋冬時裝表演》，老闆娘樂基兒則擔任模特兒行騷。問千嬅有否恭喜老闆娘？千嬅說：「係喎！不過唔可以騷擾佢工作。（有冇恭喜黎明？）傳咗短訊畀佢，佢都有覆我。」
搞完個唱擺酒
由於活動公關是丁子高任職的公司舉辦，問為何不見對方？千嬅說：「佢感冒隔離咗自己一日。（刻意分開？）唔係，佢有自己嘢做。（佢公司搞嘅活動係咪優先出席？）唔係，我做人好均真。（兩公婆一齊出席活動係咪收貴啲？）要問經理人。」千嬅多番強調現時以事業為重：「最緊要係錄埋兩首歌，黎生催我出碟，擺酒要做埋明年個唱先搞。」
穿上束腰裙的千嬅明顯「肚凸凸」，再引起懷孕揣測，千嬅即時「un」三下表清白。問到個唱後會否努力造人？千嬅說：「話唔到事，唔係話有就有。（會唔會請教陳慧琳？）都OK。（老公係咪因為想生BB而戒煙？）佢係為條命呀。」千嬅透露月底將開拍新戲，並稱不會因已是「人妻」而特別錫身。問到會否拍床戲時，她說：「如果覺得我靚都冇計。（床戲睇身材？）更加唔會搵我，如果我掂就行騷啦。」
丁子高瘦五磅
另外，丁子高前晚出席手錶活動，明顯瘦了不少。他解釋：「上星期感冒，足足輕五磅。」對於千嬅早前指他在婚前避走上海「逃情」，丁子高承認：「好耐未試過畀傳媒咬住唔放，連屋企背景都寫錯，搞到爸爸問我咩事，所以返上海休息。」他又透露會成立新公司，有可能返上海發展。問到如何與千嬅維繫感情？他謂：「兩邊飛囉！」
另外，樂基兒前晚分別換上四套秋冬新裝行騷，當她換上白色婚紗出場時，千嬅即笑笑口拍掌。雖然樂基兒表示不受訪，面對鏡頭仍報以微笑。
文：音樂組