【譚倩宜上海直擊】 周迅昨日率領鄭元暢、余文樂、張雨綺，出席i.t上海首間旗艦店開幕儀式，被傳與內地富商王朔蜜運的周迅似有備而來，當被問到有關戀情近況時，即由工作人員有默契地帶走，反觀同場余文樂與張雨綺則大談拍拖傳聞。
以一身tube top露腰裝扮示人的周迅，昨日壓軸登場，與鄭元暢等完成開香檳儀式後，在樓高兩呎、佔地逾萬呎的旗艦店欣賞09秋冬catwalk fashion show，i.t老闆沈嘉偉則隱身於觀眾席中，低調睇騷，未有參與大會儀式。
慳妹着爛衫
周迅大談時裝與工作，獨對戀情封嘴，她說：「我平時好少買衫，買親一定要襟着襟興，起碼着二、三十年，着到爛至買新。今年拍咗三齣戲，《風聲》最辛苦，多虐打戲，有打底都受傷，有次收工戲服有血漬，我周圍搵傷口，後來發現原來係道具血漿。（打算寄情工作？）啲工作係之前安排好。（有冇留意天王結婚新聞？）有，戥佢哋高興。」當記者追問周迅有指房祖名撮合她與王朔拍拖，現場工作人員立即將周迅帶走。
冇秘密結婚
反觀張雨綺則大談與余文樂的緋聞：「我同樂仔合作電影《荒村公寓》，佢好好仔，人又幽默，我哋戲中確係一對，現實中各有各忙。（拍拖會否公開？）睇情況。」而余文樂則回應：「傳我同張雨綺拍拖咁搞笑？佢份人大情大性、男仔頭，仲有啲麻甩添，我哋點有可能拍拖。我都有留意近排劉德華新聞，佢只係講善意大話，大家再傷害佢，香港就再冇好嘅藝人啦！（你有冇秘密結婚？）哈哈，梗冇啦，我邊有咁好福分。」
明天將推出首張個人EP的鄭元暢表示：「個人EP的主打MV會同林志玲合作，相信會讓大家有驚喜，（有親熱戲？）賣個關子先，大家到時留意啦！我知道張艾嘉想將我哋合作過嘅舞台劇《華麗上班族》拍電影版，我好想再同張姐（張艾嘉）合作，唔做男主角我都冇所謂，因為同張姐合作令人感覺溫暖。」
文：影視組