日本備受矚目的大型時裝騷Tokyo Girls Collection A/W昨日開幕，吸引二萬二千人次入場睇騷，當中不乏知名人士，包括殿堂級時裝設計師山本耀司（Yohji Yamamoto）、日本鑽石王老五青山光司等。Marie頭炮赴日發展，嚴陣以待，為時裝品牌Back Number行騷的她，昨早六時半已到場預備，她稱綵排時與Baby有傾偈，反而周秀娜卻因距離太遠，只打過招呼。被問到怎樣在三人中突圍？她說：「好無聊，唔使比較，做番自己，有自信行出嚟就得。」其後，Marie穿上格仔恤衫牛仔褲行騷，表演淡定，還向現場觀眾飛吻，獲台下不少掌聲。

諸葛梓岐在後台獲按摩師按摩雙腳。	諸葛梓岐與青山光司（右）和著名睫毛店老闆Chisiro合照。	王友良（左起）喜遇劉晨芝和山本耀司。

青山光司即傾合作

雖然Marie在日本暫未有知名度，但以「諸葛亮後人」之名闖日已惹來不少注目。Marie今次的負責人王友良透露Yohji昨日專程睇騷，當Marie行騷後，Yohji即不停打探伊人資料，更讚她「行得好好」，可惜當時Marie在台上還未行完騷，而Yohji又趕時間離開，結果兩人緣慳一面。另外，青山光司表示曾看過《赤壁》，亦知道Marie是諸葛亮後人，更有意找Marie合作，大讚伊人好靚女。至於會否向對方展開追求？他笑說：「冇諗過，做到好友已好好。（佢有男友？）做朋友啫，有冇男友無所謂，如嚟香港有時間會探佢。」說畢又再讚Baby與Marie大有條件在日本走紅。

渡邊知夏子	青山光司	永谷亞矢子

監製讚優雅紅得起

日模渡邊知夏子昨日為五個品牌行騷，她表示早知同場會有三位港模，還知道Marie的背景：「我知佢係歷史人物諸葛亮後人，佢好靚，好有機會喺日本發展，聽日仲約咗佢行街，交流時裝心得。」而時裝騷監製永谷亞矢子則大讚Marie樣子很優雅，在日本大有作為。Marie對於渡邊知夏子的讚美回應說：「佢都好有型，身材好瘦好靚。（青山光司想同你做朋友，會否對佢有意思？）佢係鑽石王老五，我又唔係鑽石，襯唔起佢，同埋我有男友，但佢今次冇嚟。我嚟緊會放多啲時間喺日本發展。（冇時間拍拖喎，揀做嘢唔揀男友？）我冇講過，總之我畀心機做嘢，佢會支持我。」