方大同一連三場的《Timeless Live in Hong Kong 2009》前晚於灣仔會展開鑼，全場爆滿，吸引不少圈中人捧場，包括鄭融、周柏豪、梁詠琪（GiGi）、房祖名、Fiona及陳慧琳老公劉建浩（Alex）。

Fiona大方與祖名合照，個唱期間兩人更不避嫌咬耳仔

方大同曾一度落台在觀眾面前獻唱。

祖名急腳鬆人

Fiona孖好姊妹鄭融坐，跟祖名隔了一個位，當要求兩人合照，祖名最初大派檸檬婉拒，反而Fiona大方企起身，祖名見狀即主動走近Fiona身旁，合照後祖名朋友識趣地跟他換位，讓他與Fiona並肩而坐。個唱期間兩人更不避嫌咬耳仔，睇到興起又一齊企起身拍手舞動，不過祖名完場前十分鐘就急急腳鬆人，而Fiona就睇足全場。

個唱期間，大同一度走近Fiona面前唱情歌《Long Song》及《愛愛愛》，冧得對方笑逐顏開，台下歌迷不斷大叫「好靚仔」、「好可愛」，大同更被歌迷感動得衝落台與觀眾握手，更冒險企在觀眾櫈上獻唱。

周柏豪（左起）、鄭融及Fiona排排坐欣賞方大同演唱會。	劉建浩	梁詠琪

梁詠琪撐正生

另外，有份捧場的GiGi對於有傳她臨時婉拒出席關心妍（Jade）為正生籌款舉行的音樂會，她說：「我係應承咗Jade去做嘉賓，仲話籌到嘅錢係買電腦畀學生。（有傳你縮沙？）暫時我仲係會出席。」對正生被廉署調查中，被問怕不怕敏感？GiGi說：「公司比較緊張，會留意事態發展。」不過GiGi強調如果正生有事，公司可能會叫她缺席音樂會。

文︰音樂組