鍾欣桐（阿嬌）首次主演的舞台劇前晚公演，好拍檔蔡卓妍（阿Sa）率領英皇一眾兄弟姊妹到場力撐，緋聞男友麥浚龍（Juno）雖然未見影，但其送贈的巨型花籃成全場之冠，非常搶眼！
阿嬌主演的舞台劇《星爸阿爸》前晚假灣仔演藝學院公演，唱片公司高層霍汶希及吳雨、好友阿Sa、張家輝、關智斌（Kenny）及鄭希怡等捧場支持，謝霆鋒夫婦亦有送上花籃，但亦不及Juno所送的花籃「巨」大。
捧場顯誠意
阿Sa表示開騷前特別入後台為阿嬌打氣，她說：「佢不知幾醒神、幾輕鬆，（禮物？）冇帶湯水，不過送咗好大個花籃，（唔夠Juno嗰個大？）係咩？佢有錢吖嘛，嚟捧場就係誠意搭夠啦。」阿嬌透露台下有不少親友到場支持，亦早已邀請Juno睇騷，但對方身在外地未能出席，至於張家輝看至中場休息即趕往醫院探望成奎安。
蝦碌識執生
首踏台板的阿嬌跟兩位資深舞台劇演員陳淑儀及邵美君合作，完全沒有怯場，飾演TB的阿嬌扮粗獷入型入格，當換上一條性感低胸碎花裙時，台下觀眾不禁拍手高呼，她在台上表達對陳淑儀的父女情時更真情流露落淚，場面非常感人，阿嬌謝幕時眼濕濕說：「好開心，小女子第一次做舞台劇，希望大家鍾意我哋今次嘅演出。」阿嬌自爆有不少蝦碌位，幸好臨時執生「過骨」。
另外，近日忙於內地掘金的Kenny透露將會自掏腰包請父母去沖繩旅遊，他言：「我哋一家六口一齊去，到時我會逼父母着比堅尼，（帶埋張敬軒？）佢都唔得閒啦，（咁咪唔可以一家親？）邊有一家親呀，所有人都係朋友。」
採訪：音樂組