最近盛傳援交風氣直捲o靚模界，日前o靚模鍾蕙芝又被指到深圳坐枱陪老細，一名自稱是模特兒公司老闆Bowie（中間人）更爆Lavina匿埋房間近20分鐘，惹人聯想。Lavina對事件甚為不滿，覺得自己是被人擺上枱，懷疑有人想出位設局陷害她。

話明要去慶功

昨日下午三點許，Lavina趕到港澳碼頭準備出發到澳門工作，甫見記者即怒氣沖沖，為被指援交解畫，她說：「擺明畀人陷害，我覺得成件事好無聊，完全係佢哋自己作古仔，根本嗰個Bowie就好有問題，我喺車度已經聽其他Model講話佢拖糧，仲話下次唔會接佢啲job。」

Lavina坦言該公司事先要求她出席完活動後，要去埋慶功宴，她起初亦不以為然，後來愈坐愈不對勁，她說：「佢哋話我紅啲，而且Rainbow（胡心諾）年紀細，飲酒地方唔使佢去。佢哋影到我坐埋一邊嘅地方其實係一間休息室，入到去已經覺得環境令人好唔舒服，Bowie叫過我坐埋去個男人身邊，但我唔肯，話會影響我嘅形象，然後就即刻打電話畀經理人，叫佢哋快啲畀我走。」

保留法律權利

對被指匿在房間一段時間，Lavina呼冤說：「梗係冇！仲有其他Model可以做證，佢哋見我全程坐咗喺度。」

至於Admond亦相信Lavina沒有私下派卡片，他解釋：「嗰張係我嘅卡片，佢哋唔會畀自己電話人，今次擺明畀人屈，如果再有誣衊嘅話，我哋會保留法律追究權利。」

文、攝：專案組