古巨基昨日率領鄭希怡（Yumiko）、鍾舒漫（Sherman）、周家蔚、香港先生高鈞賢、羅天宇和許家傑，到澳門出席文藝匯演記者會。昨日是基仔「牛一」，雖然要在工作中度過，但基仔覺得極有意義，大會安排切蛋糕儀式替他慶祝，而英皇高層吳雨送上煲呔，並叫Yumiko和Sherman即場吻賀基仔，惟兩女表現尷尬，最後只作狀錫面，而基仔的緋聞女友Lorraine則未見蹤影。

英皇高層吳雨及霍汶希亦有在場與基仔慶生。	鄭希怡（左）表示在晚會當天，將與Sherman互鬥舞技。	一眾港男與周家蔚擺甫士時相當有默契。

呼籲朋友捐錢賑災

問到生日如何慶祝？基仔表示向來低調，不會大事慶祝，前天已與朋友飯敍慶生。至於女友送了甚麼生日賀禮？基仔詐傻扮懵說：「我有好多朋友！佢哋之前問我想要乜，我叫佢哋唔好送，將啲錢捐去台灣賑災更加有意義。」基仔又謂自己和歌迷會均有捐款賑災，善心爆棚。談到生日願望，基仔則說：「希望台灣災民脫離苦海，自己身體健康。（結婚？）自己仲細，未諗過。」問到今年幾多歲時？基仔無厘正經說：「千禧年之後嘅20歲，（打算幾多歲結婚？）25歲先結啦！」

對於徐淑敏閃電結婚，基仔表示自己不會閃電結婚，他說：「冇咁嘅計劃。（平時好安全？）吓，你講緊搭車定搭船？我平時都有戴安全……帶。」

鄭希怡舞鬥Sherman

另外，Yumiko笑言因為搽了唇膏，怕弄花基仔塊面，故並冇真咀基仔，她表示晚會當天會與Sherman比舞，鬥跳Hip Hop，她說：「會向陳偉霆請教點跳，我想學人哋用頭轉地。（好似話轉得多會禿頭？）都未開始練！」