謝天華、陳法拉、呂慧儀、葉翠翠、敖嘉年及樂易玲等前晚出席電影《LAUGHING GOR之變節》優先場，當晚共有九個影院出售優先場門票，據知門票銷情不俗。

自備吹氣頸枕

穿上低胸連身裙的呂慧儀，甫出場即謀殺傳媒不少的菲林。當記者笑她搶盡眾人風頭時，呂慧儀即說：「優先場梗係要落力啲，但點會搶到Laughing哥風頭，你睇佢有幾多fans！」由於早前車禍令呂慧儀「頸梗梗」，故她現時出街也會自備吹氣頸枕。她說：「平時喺屋企就會用醫療頸箍。（撞車後冇check過？）當時醫生話啲骨冇事。」

同場的法拉輸性感被搶「峰」頭，但她大方表示不介意。法拉又大賣口乖，指同片的男演員均有票房保證，所以不會擔心票房問題。她說：「可以同佢哋合作，參與新戲嘅一部分已經好開心。（戲中有激吻？）今次係我銀幕初吻，之前拍劇都未試過。我係個好保守嘅人，睇到劇本時都嚇咗一跳，事前都同樂小姐、天華佢哋傾咗好耐，戲中講我主動錫天華，好彩拍咗四take就搞掂！」

法拉將銀幕初吻獻給天華。

左起：敖嘉年、樂易玲、葉翠翠、法拉、天華及呂慧儀齊齊出席，為電影優先場造勢。

天華打強心針

於內地趕回來的天華，得知優先場售票情況理想即笑說：「咁就好，唔使自己買埋啲飛！有咁嘅成績都幫我打咗支強心針。」新片上映在即，天華表示會以平常心看待：「拍時已做到最好，其他嘢我唔諗喇，唔好畀咁多無謂壓力自己。（唔使同《哈利波特》對撼喎！）我唔知點解要同人哋對撼！嗰啲係外國電影，我哋本土電影做到最好就已經得，Laughing哥唔係玩魔法，唔可以比較！」

文：影視組