本文重點
張繼聰（Louis）與謝安琪（Kay）近日頻頻登上雜誌封面，前晚兩公婆分別出席活動，Kay力斥部分內容冇禮貌兼侮辱，Louis卻在音樂會大晒愛的紋身，隔空氹老婆，更揚言鍾意陳奕迅（Eason）的程度比太太更甚，力證夫妻情未變！
雖然Kay與Eason的緋聞滿天飛，仍無損張氏夫婦的甜蜜關係，盛傳Louis為擊退情敵兼宣示「主權」，將太太及仔仔張瞻（James）的洋名紋上手臂。
臂上紋有「K JAMES」
前晚Louis與麥浚龍（Juno）舉行「拉闊音樂擂台－第二場」時，Louis大方展露右手臂上的「K JAMES」愛的紋身！但他否認待音樂會才晒紋身，平日尊重場合才遮住，前晚的音樂會代表他，不用遮掩，這紋身是去年十月紋的。
Louis亦一一回應近日的報道：「架車係我買嘅，屋企想要多架車好正常！我同老婆關係好好，我唔介意雜誌繼續寫，但係已經去到太荒誕，我提議不如寫我死咗再偷影我，然後問我對死咗有咩感覺啦！」對種種報道他一笑置之，又主動提到「情敵」Eason：「Eason係我偶像，我都好鍾意Eason，而且比我老婆更鍾意，佢係一個好歌手。」
Kay讚老公夠溫馨
前晚Kay因出席中國原創舞台劇《蝶》慈善首映，未能到場支持丈夫的音樂會，但笑言已看綵排片段數百次，又大讚Louis夠大隻有安全感，亦直認對近日的負面新聞感不快：「有啲寫出嚟係冇禮貌同侮辱，真係有壓力！」昨日她到電台宣傳時，對丈夫的愛的紋身，大讚設計靚，視為表達對家人的溫情：「之前佢有提過想紋，見到咁大，初初仲以為係貼紙！（冧爆？）都紋咗成年，以前佢都做過好多好warm嘅嘢，我間中都有做，不過冇講啫。」但她不會考慮情侶紋身。
文：音樂組