《2009香港先生選舉》將於本星期六舉行，十二位候選香港先生昨日在尖沙咀某酒店與大會司儀鄭裕玲和陳貝兒見面，歷屆香港先生包括高鈞賢、黃長興、袁偉豪亦前來撐場。袁偉豪在台上給眾師弟貼士，認為臨近比賽應戒女色，但黃長興則認為與女朋友輕鬆一下可紓緩比賽壓力。

吳雲甫否認曾結婚

負面新聞多多的熱門猛男J吳雲甫被指於06年在多倫多結婚，並育有兩歲兒子，吳雲甫解釋說：「我未結婚亦冇小朋友，嗰啲相其實係喺多倫多一間酒樓行婚紗騷嘅相，係一個美麗的誤會。」

而陳貝兒被問到可覺得被安排成嘟嘟接班人？她說：「唔敢當，都係跟嘟姐學嘢，希望可以走出以前做嘢嘅框框。」問陳貝兒面對眾肌肉男可擔心會失控？她說：「以前都見慣靚仔，但就未試過一次過見咁多，心理上都要準備吓。」

嘟嘟懶理負面報道

另外，鄭裕玲最近被雜誌指是「女版MJ」，嘟嘟姐說：「冇睇過，亦唔會理呢啲不懷好意嘅報道。」嘟嘟姐認為J吳雲甫即使已婚亦沒有問題，因為與遊戲規則未有牴觸。

此外，羅天宇拍攝電視電影《四葉草》傳與DaDa撻着，兼被拍得撐枱腳照片，羅天宇否認戀情，表示自己要與女性經相處後才能發展，他指不明白為何只是普通食餐飯，也會惹來記者拍照。

採訪：影視組 攝影：黎志輝