「絕世死敵」鄧麗欣（Stephy）和傅穎（Theresa）今日在書展正面交鋒，兩人同場接力搞簽名會，充作先頭部隊的兩批fans連夜排隊造勢，在這決戰前夕的緊要關頭，Theresa昨晚搶灘現身會展，親餵fans食腸仔慰勞，先贏一仗！
書展今日開戰，本來只有一小時的簽書會，死敵Stephy和Theresa鬥加時，Stephy搶頭啖湯於今早11時至1時搞簽書會，Theresa則緊接於1時至3時舉行，各不相讓。兩批fans亦嚴陣以待，早幾日已瞓街通宵排隊，Theresa的fans以四十幾人撼贏只有十多人的Stephy迷 ，而沒有公司撐腰的Theresa，昨晚惟有「自救」，捧了一大箱飲品及親手整的菠蘿腸仔來探班，還親手餵fans食腸仔，fans興奮到狂叫吶喊，贏了玩潛水的Stephy一仗。Stephy的fans全程冇聲出，十分無癮！
連夜排隊感動
Theresa表示知道fans連夜排隊好感動：「之前掛9號風球都好擔心，所以自己整食物慰勞fans。（知唔知Stephy早過你搞簽書會？）知道，公司叫我12點幾到。」本來書商只送100件Theresa親手繪畫的tee給fans，但Theresa為了答謝fans支持，決定自掏腰包送多200件，狂冧fans。
至於Stephy前晚出席艾粒的DVD首播會，坦言預了和Theresa碰面，問會否買Theresa的書？她說：「叫佢送，應該會交換。」對於Theresa書中自爆遇上愛情騙子，被金牌大風CEO陳輝虹暗寸是幽靈，Stephy笑說：「哈哈！我諗佢講笑想轉移視線，唔好猜測係公司人，可能我估到係邊個，估到話畀你知。」
唔介意執象腿
至於有網友指她是象腿，懷疑寫真的長腿照片是執相效果，Stephy說：「唔知有冇執，就算係執都係Art Director執，但我唔介意，以前打排球真係腳粗，但食素之後已經瘦好多。」陳輝虹則否認刻意隔離兩女搞簽書會：「佢哋冇感染H1N1，唔需要隔離，佢哋健康狀況良好。」