近日忙與老友鄭伊健拍蠱惑片《飛砂風中轉》的小春，前晚如常到片場開工，以為無人記得自己生日，於是扁晒嘴坐埋一邊等化妝，工作人員更騙他枱上的乳豬是道具。

出蠱惑扮24歲

至埋位時，方中信、藍奕邦、農夫的C君及於戲中扮演「少年小春」的曾國祥，齊聲高唱生日歌，這時小春才發現被整蠱。他笑着地說：「邊個咁有心思？多謝晒！」不過他看見乳豬頭上插了代表他歲數的「42」數字洋燭時，即靜靜雞調掉成「24」，還風騷地告訴曾國祥自己今年廿四歲，非常搞笑。

好友鄭伊健身在日本工作未能出席，小春透露對方已越洋來電祝賀，日內伊健會與他食飯補祝。導演莊文強亦對小春愛錫有加，不但讓他提早收工會女友，還特別安排文戲，不用他在生日時打打殺殺。

願望世界和平

問小春有甚麼生日願望？他說：「身體健康，世界和平！唔係行貨，依家世界真係好混亂！睇吓班年輕人，唔係吸毒就打劫，好擔心！（幾時結婚生仔？）我有分數，唔好咁八卦啦！」話雖如此，其後他借意問方中信生B秘方，又問對方如何氹女友生BB，似乎暗示希望成家立室、開枝散葉。

文：專案組