元紅怕打‧一躍過關

元秋憶述當年只要于師傅的藤條一出，即使學員如何無信心做得來的動作，最終都能一一克服，她說：「嗰時練功有樣嘢叫『跳枱』，即係我哋打一個觔斗，就從枱嘅呢一面翻過對面，細個睇到張枱咁長咁闊，真係唔敢跳，嗰時師傅要我哋一個跟一個逐個跳，跳完繞圈排番隊尾，再跳。嗰時每次輪到元紅，佢跑跑跑跑，臨去到張枱前面就例必急煞，然後就同師傅用上海話講『阿拉弗會』（意即我唔識），師傅見佢咁就叫佢行去隊尾再排過。」

師傅突然順攤，元紅以為過得骨，一於重施故技，元秋續說：「元紅第二次又照辦煮碗，師傅都由得佢，到第三次佢又想嚟呢招，師傅已經醒水，一條藤條從後『發』埋去，元紅想避，不知不覺就咁跳過咗張枱，跳完佢擰番轉頭同師傅講『阿拉會啦』（意即我識啦）！你話，唔出藤條都逼唔到班細路認真，師傅係咪唔出藤條唔得吖？！」

那些京劇基本功，于占元不相信有徒弟做不來，成龍就曾在自傳《我是成龍》中憶述：「師傅只相信三件事情：懲罰、練功以及服從。懲罰是用藤條來執行，練功則是生活的標準，而服從在學校裏是被嚴格要求的。」

命懸一線‧化險為夷

或者就是這種藤條教學方法發揮作用，激發了學生潛能，令「元」家班人馬，即使有人遇上九死一生的危機，往往都能在命懸一線的最後關頭化險為夷。

元彬說：「七小福滿師之後，好多師兄弟都入咗影圈搵食，好多人做咗龍虎武師，但咁多年嚟從無聽過有于占元嘅徒弟拍戲跌死、撻死，但其他武師間唔中都有一、兩個，呢啲就係師傅嘅功勞，佢逼我哋由朝練功練到晚，翻觔斗翻得多，我哋自自然然就識得落地嗰下點樣保護自己，唔使受傷。所以到依家七小福一個二個仲『生勾勾』喺影圈度繼續搏命，真係要多得師傅當年嗰條藤條。」 （廿二）