剛於紅館舉行處男個唱的林峯，繼續馬不停蹄工作，透露計劃出國語專輯。昨日林峯接受《巴巴閉邊個夠我查篤撐》訪問，分別從謝安琪（Kay）、楊怡與緋聞女友鍾嘉欣（Linda）作配對家姐、妹妹和老婆人選，林峯大讚Kay識照顧人，首選對方為家姐，至於「老婆」，林峯就笑言順應主持人查小欣心意，不避嫌選擇Linda，他說：「煮嘢食就唔知，但嘉欣感覺好體貼，可能係佢把聲，好舒服，小鳥依人咁！」他又指Linda男仔頭：「唔好畀佢把聲呃到。」提到Linda未有現身其個唱，林峯說一早就知：「佢要開劇，（叫佢唔好嚟？）冇！」
出身名門的林峯表示入行後心理壓力亦隨之增加，他說：「唔衰得！」又指父親希望他承繼父業，不排除日後可能從商，他說：「細佬一早話唔入行，又鍾意做生意，依家交畀細佬先，自己都有諗過做生意，始終係長子嫡孫。」