本文重點
今天牛一的的湯盈盈，日前趁着空閒，與男助手前往銅鑼灣行街，期間見她於一間另類寵物店睇龜及蜥蜴，見她不時蹲在地上逗玩巨龜，又向店員問價，未知她是否想買巨龜給自己作生日禮物呢？
日前約下午三時，湯盈盈與男助手Kelvin現身銅鑼灣景隆街，未幾見她進入了附近一間水貨店睇波鞋。見她試完一對又一對，三心兩意，最後她挑選了一對厚底波鞋，穿上埋鏡照一照後便扑錘買下，然後即時換上。
冇時間慶生日
之後盈盈途經一間寵物店，突然被店內一隻放在圍欄內的巨龜吸引着，並即時推門入內觀看。原本盈盈只站在小圍欄前與助手研究，看了一會即跨過圍欄蹲在地上逗玩巨龜，並不時向店員問價，經店員解釋後，原來這隻名叫蘇卡達陸龜是鎮店之寶，乃非賣品，每隻訂購價八千元起。其後盈盈又轉往睇蜥蜴，就算發現有記者拍照也未有理會，繼續眼定定研究。
當時店內有一女顧客手抱巨蜴，盈盈初時顯得有點抗拒，但未知是否見到記者在場，不容失威，遂鼓起勇氣上前觸摸蜥蝪，逗留約半小時多，她才捨得離開。
五年前，盈盈曾買了兩隻龜返家，怎料養了一星期其中一隻突然死亡，事後問到盈盈是否打算買多隻龜作伴及當自己的生日禮物，她說：「唔係，不過我屋企有養開龜，仲養咗五年，今次我係諗住買畀朋友。（生日點慶祝？）我依家拍緊新劇，仲要開通宵，應該都冇機會慶祝。」
文、攝：追蹤組