黃秋生有份參演的新片《Laughing Gor之節》，日前傳出有無綫藝員因被劇組搶人開廠拍劇，結果要臨時取消電影通告，此舉引來秋生不滿，認為有人冇好好協調演員檔期，令趕拍中的影片完工日期一拖再拖。
據知，《Laughing Gor之節》原定上周日有通告，但最終因為有演員檔期重疊，結果被迫取消。
記者向秋生求證此事，他說：「係有個演員檔期撞咗，名就無謂講，因為都唔係佢嘅錯。我都唔明無綫應該有人負責協調藝員通告，呢種問題係可以避免，套戲咁趕，取消通告又牽涉咁多人同錢，係咪有人冇做好本分？我唔係話拍劇唔重要，但我耳聞目睹過唔少藝員深夜先收到聽晚通告，人哋唔使生活嘅？我聽過有演員問工作，竟然被人質一句『你知嚟做乜？』好似當啲演員唔係嘢咁。我見過樂易玲嚟探班，但從未見過有經理人嚟跟場，由得啲演員自生自滅。套戲依家拍咗一半，咁樣jam咗一日通告，套戲又遲啲完，TVB究竟重唔重視套戲？我為套戲自己畀錢買私伙衫，如果TVB唔重視，我就一齊hea，但我最唔想做到咁。」
首次演戲即拍影帝
日前才開完無綫劇《女王辦公室》的呂慧儀，成了秋生口中的嫌疑人物，她說：「我不嬲聽經理人安排，叫乜做乜。（改咗通告？）唔知呀！（秋生嬲，會否尷尬？）唔會，佢好錫我，成日問我睇咗劇本未？我第一次拍戲就同影帝合作，我要睇熟啲。」
冇劇在身的謝天華則說：「唔知秋生講邊個，我就冇劇喺身，法拉去咗加拿大登台，返嚟至拍埋個尾。」同片周美欣則表示：「我啲通告冇乜改，如果有都會預早通知。」
樂易玲謂小事一宗
而樂易玲回應說：「小事一宗，電影嗰邊星期五先攞期，咁啱係個演員開廠嘅主景，所以要電影就，溝通問題啫，製片早啲攞期可以減少類似情況，TVB全力支持套戲，好多謝秋生畀意見。（經理人冇跟場？）我叫唔好跟嘅，等演員學識獨立。」
《女》劇監製黃偉聲則表示：「劇組通告排好晒，電影嗰邊突然間要呂慧儀，真係畀唔到佢，但當日都有打畀佢哋，話2130可以放人，不過佢哋話已經唔使。」
文：影視組