黃長發與李姿霆（Karen）這對「姊弟戀」愛得快分得快，分手後Karen向傳媒多番哭訴，長發一直「啞仔食黃連」，昨日長發終開腔回應，坦言是由他提出分手：「起初唔知佢有男朋友同有個女，如果一早知就唔會一齊。」談到Karen拋掉學法文的筆記簿及情信，更遭記者拾到，長發坦言心裏已受傷害：「都會好hurt，私隱係要保護嘅，我覺得佢專登丟掉，我體諒佢（想夾新聞），但自己就不斷畀佢傷害，我唔會再保護佢，同佢冇朋友做。」

長發坦言下月將返新工，於法國麵包舖做公關：「之前拍拖成日要出街食飯，又有記者跟所以要揸車，搞到愈嚟愈少錢，依家賣埋架車，希望下個月工作後經濟正常番，重新開始。」問他拍拖時是否如報道所指經常使Karen的錢？他說：「唔會講佢冇請食飯，我都有買嘢送畀佢。拍拖兩星期，佢話送架開篷車Alfa Romeo畀我，我唔想欠佢都冇要。」

被斥死仔唔開心

長發坦言拍拖五個月後，二人差不多天天嗌交：「我有時都忍唔住會講粗口，我諗佢有錄音，我怕佢騷擾我屋企。佢本身唔係咁嘅人，但有人教佢。同埋我接受唔到佢家人唔鍾意我，呢個係大問題，佢爸爸當面叫我『死仔』，我好唔開心。」他又稱曾因自己呷醋而嗌交：「佢啲朋友同我講佢有好多男性朋友，我想去朋友屋企，佢又唔畀，話我會識女仔，不過我都有要求佢出街唔好望男仔，我有個男性朋友，都叫我小心啲，因為Karen曾經電佢，（你在場feel唔到？）我feel到，所以咪嗌交！」

長發又坦言Karen曾跟他說不會與他一世，故盡量開心，但他亦無悔與Karen拍拖：「始終開心過，但唔可以咁自私，之後數臭人，（但佢係喎！）我惟有祝福佢，乜都要經大腦，我唔想傷害佢。同佢散咗係好事，好開心見到媽咪笑番、老竇同我講番嘢！」

長發在二人分手後轉了電話，更謂：「我想避開佢，重新開始，我哋唔係假分手，畀機會我都唔會再見佢，佢屈我哥哥，話係我哥哥叫我哋公開戀情，哥哥一定唔會咁做，呢個係我idea，嗰陣鄧生（「鞋王」鄧劍群）搵樂小姐，我怕對哥哥有影響，所以主動話開記者會。」

情敵改口喚阿發

此外，昨日亦有雜誌刊登長發訪問，Karen坦言有看：「大家和平分手，（阿發話掟咗佢畀你啲嘢好心痛？）我冇諗過記者會執垃圾，但其他嘢可以留嘅都留，之前報道又話我愛出風頭，係我就化個靚妝出嚟畀人影啦！（會否之後不再做訪問？）唔做啦！之前畀我鍾意嘅男人話係大話王，梗係要出嚟澄清一句！」

至於「鞋王」鄧劍群則謂：「多謝發仔，佢救咗我，呢個女人不值一提。（阿發話佢多男友又錄佢音？）錄音真係好毒㗎！如果我係黃長發老竇，都會打醒個仔。」提到追討Karen物業一事，他說：「呢啲官司排期都拖幾年，係佢至周圍講，佢有乜嘢可以準備啫？（咁個女跟邊個？）畀佢啦！佢講到個女對佢咁重要。」

採訪：影視組

場地：修士吧