現年38歲的洪欣，昨日與比她年輕11載的張丹峰，於四季酒店擺喜酒，毛舜筠、關禮傑、連凱、吳毅將均攜同另一半出席，黃百鳴、鄭明明、戴思聰、梁琤等亦有到賀。而新娘的閨中密友蔡少芬（Ada）、蒙嘉慧及陳法蓉則全以性感晚裝上陣，組成性感姊妹團，與新娘競艷。期間Ada更風騷得大騷長腿，惹來蒙嘉慧伸手「輕薄」，令Ada十分尷尬，而台灣女歌手潘美辰穿西裝反串做兄弟。

洪欣昨日與內地演員張丹峰拉埋天窗，正式結束四年愛情長跑。	Ada（右）在好姊妹的婚宴上大騷長腿，蒙嘉慧則谷胸上陣。	Ada及蒙嘉慧為洪欣拿着裙尾。

婚禮簡單為主

一對新人昨晚六時聯同兄弟姊妹團見傳媒，洪欣說：「婚禮以簡單為主，請牧師嚟註冊，今晚擺咗十幾圍，旨在同親戚朋友食吓飯。我個仔做花仔，佢雖然緊張，不過最開心嗰個係佢。（有冇畀老公愛的宣言感動？）佢成日都講㗎啦，到目前為止我都仲未感動到喊，因為好忙，未有時間停低。（出閣前一晚有冇緊張？）唔太緊張，但時間愈接近，愈驚招呼賓客有唔周到嘅地方。今晚由Ada設計玩新人項目，我任由佢哋安排，唔會錫住個老公。」蒙嘉慧則大爆會要求兄弟團以口將糖傳給新郎。

發表愛的宣言

而張丹峰則大講冧老婆說話，他說：「尋晚都有啲緊張到瞓唔着，因為好開心可以娶個咁好嘅太太，我會用心照顧佢一輩子，愛佢一生一世。」

此外，朱玲玲昨偕羅康瑞路過四季酒店時，一見大批傳媒便即時掩面，又與酒店人員密斟。相反，李兆基則主動向記者打招呼，並吩咐工作人員派水給傳媒。

文：影視組