梁漢文（梁炳）、鄭融等昨日出席活動，有指梁炳和古巨基在音樂頒獎禮上，互當透明一事，梁炳解釋：「我哋有打招呼，係你哋睇唔到啫，做朋友講緣分，啱傾做朋友傾多幾句，再熟落啲可以做兄弟，但唔係太有緣分就會禮貌打招呼。」豈不代表與基仔冇緣分？梁炳即言：「唔係咁意思，千祈唔好咁講，我唔想再講嘞，當初件事都唔關我事，唔想再有誤會變是非。」
基仔見側田和小肥會擁抱，與梁炳則打招呼，友情度似有分別。梁炳笑言：「我唔知佢點界定，但大家唔好再雞蛋裏挑骨頭呢。」
而鄭融就以一身夏裝背心熱褲表演新歌，對於她的母校澳洲國際學校確診多宗豬流感，她表示睇新聞才知此事，因為她在這間母校成長，所以特別有感情，並呼籲學弟妹要多吃蔬菜、水果和飲水，亦要勤用消毒液洗手。