三位靚模周秀娜（Chrissie）、DaDa及Annie G.昨為一髮型化妝大賽任模特兒，Chrissie說長髮已留了多年，但她讀書時曾是男仔頭：「有年突然將頭髮剪短，之後又買鬆身衫着扮男仔，連舉止都粗魯晒，（有冇女同學向你示愛？）嗰陣我轉咗學校，有個女同學喺情人節請我食朱古力，又話想識我。」
對於蕭芳芳指近日靚模袒胸露乳敗壞風氣，Chrissie說：「前輩講嘢就要聽，但作為模特兒，我只係尊重工作，其實都係睇工作需要，性唔性感係大家界定。（有模特兒刻意走光搶鏡？）我唔會，我次次都做足安全措施。」同場的蒙嘉慧為捧髮型師場而來，原本她與男友鄭伊健用同一髮型師：「佢用得好咪介紹我，（代表伊健嚟？）都代表埋自己，（感情點？）好好，負面新聞日日有，我唔會為咗咁唔開心，會繼續開心生活。」