黎耀祥憑着「柴九」一角人氣急升，昨日到街市出巡，被一眾fans圍住影相、簽名。祥仔希望大結局當晚能超越《大長今》的最高五十點收視，就連街坊都力撐他「一定掂」，頓成為街坊心目中「視帝」。
黎耀祥於《巾幗梟雄》中的「柴九」一角成為觀眾焦點，昨日他到將軍澳街市行了一圈，隨即「被圍」，fans層面遍及男女老幼，行過每一個檔攤個個都大大聲叫他「柴九哥」，連菲傭也圍住他合照。
四奶奶死唔去
識做的祥仔不忘乘機宣傳，叫他們欣賞大結局，有位拖着老婆的先生謂：「我老婆係你fans，家陣晚晚要提早個幾鐘食飯，跟住睇你！」亦有老闆娘話晚晚收檔都趕返屋企，更問祥仔四奶奶會否死去，祥仔笑謂：「四奶奶唔死，佢點死得呀！」祥仔表示希望大結局有51收視點，破《大長今》的最高50點紀錄。
祥仔表示甚期待周五與電視迷一同在商場欣賞大結局，感受柴九一生。他說：「觀眾係角色嘅朋友，自己都想成為觀眾一部分，感受柴九淡淡哀愁，壽終正寢，雖然有啲唔捨得，但呢個結局係最完美，我諗自己喺現場睇都會好感動。」問祥仔會否希望有柴九前傳或續集？他說：「唔想，柴九一生最有意義就係咁嘅結局，唔會再有柴九喺呢個世上。」
熱潮一過就冇
問祥仔現時有否「飄飄然」感覺？他說：「冇，呢啲一過就冇，以前《西遊記》嘅豬八戒同《樂壇插班生》中嘅羅記都好受歡迎，只不過今次係主角，注意力放咗喺我身上，我比較享受拍攝時候嘅過程。」不少網民都指他今年可奪無綫「視帝」獎項，祥仔卻表示從不奢望。
此外，今天劇情講到四奶奶被大奶奶陷害收監，柴九設法救她，更指出彭鏗罪證。而四奶奶收監前將鎖匙交給必正，讓他主管蔣家，而大奶奶則接了必文返家，繼續搞風搞雨。另據知大結局當晚，劇集會以加長版播足三小時撼亞視台慶。
文：影視組