曾和同門師兄洪卓立傳過緋聞的詩雅（Michelle），原來「密實姑娘」早已轉新口味，不愛書生改「嗒」大隻男。日前Michelle和身高六呎、樣子有幾分似周柏豪的型男到尖沙咀海港城約會，型男見Michelle揹住大背囊時，即「出膊相助」代為揹袋，甚有風度。而Michelle亦熱情地翹住型男的「麒麟臂」往冒險樂園玩遊戲。
兩人其後轉行運動舖，Michelle專攻三點式泳衣，並將泳衣擺在上身要求型男給意見，但對方卻擰擰頭，Michelle就將泳衣放在型男身上，接着大笑一輪。行經男裝部時，Michelle體貼地為型男揀了波鞋及T恤，不料型男不拘小節，竟即場脫去上衣露點及腹肌，嚇得Michelle「Ｏ晒嘴」並狂打男伴阻止他露體。
未知是否型男的豪放行為激親Michelle，兩人買咖啡時，黑面的她先大力捏型男的面珠，坐低後又狂扯型男的衫，但型男幾句花言巧語後，Michelle就怨氣全消，繼續甜笑和型男同食一件芝士餅。
記者致電Michelle追問是否有新戀情，她哈哈笑說：「總之佢係我一個好親密嘅人，其他唔講。」