基仔和金牌大風的續約是非搞到滿城風雨，有傳基仔有感恩師黃栢高（Paco）被明升暗降，有意離開合作六年的金牌，終被金牌新任CEO陳輝虹和太子爺鄭中基聯手炮轟，令基仔更加意興闌珊，早前他接受無綫訪問時公開表示不續約金牌。
京‧澳雙響炮
由於基仔和金牌反面收場，英皇更加落力斟他加盟，日前英皇唱片及藝人管理部總監霍汶希（Mani）就出口叫金牌唔好「整死人」，明撐基仔過檔有理，究竟天王基花落誰家？答案終於揭盅，據知經一輪風波後，基仔被英皇誠意打動，決心過檔，日內就會動筆簽約，其過檔身價高達二千萬，絕不是之前傳聞的賤價一千萬簽三年。
英皇對基仔加盟隆重其事，將豪擲二百萬舉行巡迴記者會大事歡迎，配合基仔的天王身份，頭炮是斥過百萬人民幣，於周日（31日）假北京六星級酒店舉行簽約記者會，並在台上放煙火歡迎基仔。不過，正當記者會籌備得如火如荼之際，酒店以安全為由擱置放煙火，但英皇仍在努力爭取中；而第二炮就於6月5日假澳門舉行盛大記者會，由老闆楊受成率領CEO吳雨、Mani及一姐容祖兒撐場。英皇並為基仔鋪定青雲路，除推出廣東碟和國語碟，令唱歌事業更上一層樓外，還會為他度身訂造劇本，全力助他進軍影圈。
吳雨輝虹交戲
雖然基仔去向已塵埃落定，前晚英皇CEO吳雨和金牌大風CEO陳輝虹在香港音像版權有限公司廿五周年活動上碰頭，兩人卻玩先禮後兵，吳雨主動和輝虹握手拍照，齊齊交足好戲，記者問吳雨幾時公布簽基仔？他搞笑反問輝虹，還鬼馬地說：「乜基先？佢走唔一定嚟我度，我唔知。（有變數？）或者輝虹升CEO發功呢！」在旁的輝虹沒好氣，以教記者作還擊說：「你哋寫陳輝虹掩嘴微笑回應大哥（吳雨花名）。」
記者再問吳雨是否月尾公布？他說：「一日未到，一日未知。」還笑問輝虹有冇嘢講？記者指輝虹已經鬧咗人（基仔），他說：「我冇鬧人。」吳雨即暗寸謂：「警惕啫，唔鬧唔得大，不過我哋（英皇）冇鬧人，只會錫人，總之今日未係適當時候公布。」
文：音樂組