出身自演藝世家的婷婷，在加拿大讀書後就返港發展，主攻模界發展。無綫睇中她有新鮮感，計劃邀請她與何守信主持台慶月大型紀錄片《活着》，並將於七月遠赴非洲埃塞俄比亞原始部落、中國周口店與馬來西亞拍外景，追溯人類歷史起源，料拍攝需時，婷婷要暫別模界一段日子。
全家做慣主角
婷婷做主持表現如何尚未知道，不過，憑着其強大演藝世家背景，老竇謝賢、阿媽狄波拉及阿哥霆鋒都是演慣男女主角，阿嫂更是影后張栢芝，加埋契媽汪明荃在背後組成的超級軍師團，相信必勝無疑。
無綫花過百萬製作這部大型紀錄片《活着》，希望將活得有意義的訊息傳給觀眾，為社會打氣。主持人方面由有分量的何守信（何B）配人氣爆燈鄧萃雯與婷婷，但雯女因檔期問題仍在斟酌中。
何B怕體力差
就此事聯絡婷婷的經理人阿輝，但未獲回覆。至於今次重返無綫以拍劇為主的何B，曾揚言不想再做主持，但今次則破例答應。昨日何B在電話中說：「我一向對歷史好有興趣，希望趁有生之年可以學多一啲。雖然喺心理同思想上都好有興趣去做，但去咁多地方就唔知體力上應唔應付到。」
當年何B任節目主持時曾捧紅不少「小花」，他繼《畢打自己人》與鄭欣宜合作後，又會再與舊愛汪明荃契女婷婷合作。何B笑說：「唔好講到話栽培小花，但咁啱又係同啲世姪女合作。」
謝賢鼓勵愛女
至於「四哥」謝賢目前正身在內地，對於無綫邀其愛女做主持，四哥接受電話訪問時說：「我仲未聽婷婷提過，我會鼓勵佢試，後生女應該乜都去試吓，我會交代叫何B多啲照顧婷婷，唔係返嚟打佢（何B）。雖然依家豬流感（H1N1甲型流感）咁厲害，但有乜好驚！」
身為婷婷契媽的「阿姐」汪明荃則說：「係呀，等我見到佢時問吓佢。（有咩心得畀契女？）未知㗎，要睇吓個節目乜嘢性質同睇吓婷婷有冇興趣，我會同佢傾吓先。」
另外，阿姐昨日出席活動時，笑言擔心與羅家英相見好同住難：「最重要佢開心同畀空間大家，（係唔係分房瞓？）未諗呀，不過唔得都要啦！」
文：影視組