伍詠薇與練海棠今年結婚十周年，人前人後恩愛如昔。她直言夫妻相處之道在於坦誠和分享，要循規蹈矩，她亦認為已為人妻亦不要疏忽，為自己打扮，不要做「黃面婆」。
伍詠薇和練海棠結婚十個年頭，每日都處於熱戀的甜蜜時期，她表示一對夫妻最重要是包容和分享，不要單方面去理解對方的想法，她說：「其實我哋結婚第七年真係會有七年之癢，個人覺得好悶，自己又想打扮靚啲畀其他人讚。但結得婚就要遵守遊戲規則，千萬唔可以越軌，打扮靚有人讚當然開心，但其實另一方面都係為咗我老公啫，我有人讚佢仲開心。」
最緊要樂觀
伍詠薇坦言老公一向循規蹈矩，自己亦沒有擔心過，她說：「你愈擔心就愈影響大家感情，相處在乎信任，有一日你要擔心嘅，其實已經輸咗。我以前都試過做緝私犬，但依家明白係冇用嘅。愛不在於追蹤。」她表示做人最重要是樂觀，心境開朗人都變得漂亮。
皺紋嚇親人
伍詠薇近年又忙於拍劇，家庭和工作上的時間相當緊迫，但她表示婚後的女人絕對不能偷懶，美容來裝扮自己不能馬虎，她說：「拍劇成日捱更抵夜，啲暗斑、皺紋出晒嚟，自己唔驚，老公、朋友見到嚇親人啦。女性廿五歲就要為自己裝扮吓，我宗旨係用最少嘅化妝品，但要用最好嘅護膚品。」
伍詠薇一放假便會到美容中心，她說：「拍劇成日出外景，搞到有斑同皺紋，女人一定要保養。」
文：影視組
場地：Bella Skin Care Centres