向來鬼妹仔性格的陳茵，日前放下「港姐」冠軍的身份，到銅鑼灣藥房連鎖店，大方購買女性用品，事後她表示如買沐浴露，全無尷尬之色。
近日忙於拍攝無綫處境劇《畢打自己人》的陳茵媺，日前被發現以一身背心、短裙性感打扮，單拖在熙來攘往的銅鑼灣鬧巿出沒，戴住黑超的她，未有理會街上途人的目光，邊行邊購物之餘，行到熱熱哋更到果汁店買果汁狂啜，我行我素。
識得格價
陳茵媺看來未有太大購物意欲，全程齋睇冇買，直至行到一間藥房連鎖店，她突然內進，一入店內即左望右望，眼見店內人流唔多，她除低黑超，拎起購物籃行到擺放女性衞生用品的地方，拿起女性洗陰液左睇右睇，詳細研究，全不擔心會影響「港姐」冠軍身份。一輪格價後，陳茵媺掃了兩、三支，但她仍意猶未盡，繼續在店內四圍逛，再買口罩及護膚品、面膜等，認真收穫豐富。
買定口罩
事後致電陳茵媺，她表示自踏入青春期都慣用洗陰液，所以購買時，絕對不覺得尷尬：「女仔應該注重衞生，用晒就要買，加上香港天氣潮濕，唔用唔舒服。（唔尷尬嗎？）唔會，由細買到大，感覺好似買沐浴露咁。」此外，她表示上周患感冒，以致喉痛失聲，再加上豬流感（H1N1甲型流感）肆虐，於是趁空買定口罩，做足預防。
文：影視組