李思欣日前為無綫新劇《蒲松齡》到元朗南生圍開工，在酷熱天氣下，要在草長高過一個人的郊外拍足六個鐘，劇情更講述她要在又濕又跣的泥地上被人糟質，相當慘情！
思欣在劇中可謂多災多難，除先後被陳錦鴻及飾演山賊的演員掌摑外，日前在南生圍開工，更差點當場中暑，她說：「嗰日喺南生圍拍咗六個鐘，唔知係天氣熱，定係啲草太長太翳焗，拍到個人都好似想中暑咁。劇情又講我被糟質，嗰度啲泥又濕又跣，工作人員仲話有蛇添，雖然蛇我就見唔到，但就有好多奇形怪狀嘅昆蟲，就算我有用消毒洗手液同濕紙巾，但好快十隻手指又綑晒黑邊。收工返屋企我第一時間沖涼，睇新聞至知原來同日有班長跑人士中暑，所以都幾難忘！」
思欣又指在《蒲》劇中第三度與鍾嘉欣合作，兩人已變成好姊妹，思欣說：「同嘉欣合作過《搜神傳》、《法證先鋒》，佢超好人，所以我哋都幾friend，嗰日拍我喺夢境中要着晒佢啲衫，同佢梳埋同一樣嘅辮嚟扮佢，嘉欣講笑話我哋可以組Twins。」