寰宇新人陳楚喬早前有份演出無綫新劇《廉政行動2009》，並與資深演員林雪飾演父女。首次拍劇的陳楚喬，笑言初期壓力很大，幸得林雪從旁指導，令她獲益良多：「佢戲入面做我爸爸，估唔到現實中都好似我阿爸咁成日照顧我。佢一到片場就入晒戲，所以有佢喺度，我就好易入戲；佢仲成日教我點走位，真係好多謝佢。我第一次同咁有經驗嘅前輩合作，真係學到好多嘢！」
在劇中飾演大學生的陳楚喬，坦言角色有很大挑戰性：「最難係喊戲，好彩有個令自己入戲嘅秘方，就係聽歌。由於我本身對音樂好敏感，有時聽聽吓歌就會喊起嚟，所以靠呢樣嘢培養情緒。（邊首歌？）林憶蓮嘅《哭》！憶蓮係我偶像，首歌嘅詞真係好好！」
