樂基兒日前不慎走光，有「翻版樂基兒」之稱的周秀娜前車可鑑做足安全措施，昨日「瞓身」擔任遊戲活動嘉賓時，除展露誘人身段外，更左趴右趴任影唔嬲，「大方」程度拍得住正牌樂基兒。
周秀娜昨日為「Xbox 360 遊戲同人館」活動擔任示範嘉賓，為免重蹈樂基兒露點覆轍，周秀娜在背心內再穿背心，做足保險工夫，而向來不怕在人前大騷性感的她，更趴在床上打機，即時引起哄動，除了傳媒外，現場的攝影發燒友也爭相拍下周秀娜32D的美好身段，難得伊人亦好識做，在床上趴完左又趴右，滿足各方鏡頭的需要，並面無懼色任影唔嬲，相當親民。同場還有另一位32D的模陳麗玲（Norain），雖然只是在周秀娜出場前後「攝場」，但也睇頭十足。
胸口敏感見紅
周秀娜接受訪問時，被發現胸口有不少紅印，原來是工作人員好心做壞事，她說︰「我對毛氈同公仔好易敏感，可能頭先張床有毛氈所以敏感。」問她趴下時怕不怕像樂基兒般走光？她即時說︰「我做足安全措施，打咗兩層底，平時喺屋企都係趴喺度打機，好似冇腰骨咁；不過我當然小心啲，慢慢瞓落去，今日要瞓身支持。（趴低緊張？）我只係怕趴得唔夠靚。」對於現場有不少攝影發燒友，問她可有試過被他們跟蹤？伊人表示沒有，並讚他們有禮，男友亦不會擔心。
拍戲三點不露
周秀娜又澄清沒有為《Laughing哥前傳》試鏡，但不諱言恨做Laughing嫂，對於套戲多影帝？她說：「我呢啲新人要攞多啲經驗，要多嘗試多拍戲。（怕唔怕性感？）總之三點不露。」
文：名人組