本文重點
莊思敏、Lisa S.、梅小惠前晚擔任《美女廚房》嘉賓，三人炮製蒸蟹時均煮不熟，蟹膏仍是水狀兼有泥臭味。Lisa S.廚藝低劣，全賴男友吳彥祖為她下廚，否則會餓死，吳浩康（Deep）發女友炆憎，更硬食她煮的臭蟹！
三女前晚在《美女廚房》煮指定菜式蒸蟹缽及蒸糯米飯，除了小惠較似樣外，Lisa、莊思敏都雞手鴨腳，分別請來楊洛婷及Deep幫手，Lisa拆蟹時用手搣，蟹亦似乎沒洗過，蒸糯米飯時，竟用膠筲箕又沒有落水，周中發現時大喊：「 Oh my god！no water，冇水！」爆笑全場。
評判逐個攬
周中眼見Lisa很論盡即出手幫忙，Lisa攬攬周中又讚他靚仔，然後逐個評判攬。
嘉賓評判吳卓羲（Ron）、阮兆祥都不敢吃Lisa煮的蟹，唯獨是周中死撐她，主持鄭中基不禁罵道：「人哋攬一攬你（周中）就乜都得。」莊思敏煮蟹時男友Deep相當勞氣，忟憎罵女友，替女友炒飯時，Deep被祥仔寸謂：「你記住啲飯整硬啲喎，唔係人哋話你食軟飯呀！」Deep試食時說：「愛係包容同忍耐，如果我寄望佢識煮嘢，就吐血死咗。」
而鄭中基一聞莊思敏煮的蟹即說未試過近距離聞屎，周中聞言笑言：「唔臭就唔係蟹啦！」又叫鄭中基捱義氣飲「蟹水」。至於兩位嘉賓評判Ron及阮兆祥頂硬上試食生蟹膏，並硬吞落肚，Ron食時祥仔笑言：「下個禮拜收費台推出《永遠懷念吳卓羲》！」二人之後用水漱口。
Lisa坦言第一次掂「鑊」，猶幸男友吳彥祖從來沒投訴她，有時更為她下廚，她大晒幸福的說：「冇咗佢我會餓死。」幫Lisa手的楊洛婷穿睡衣上陣，甚有睇頭。令男友Deep相當勞氣的莊思敏想學烹飪多時，因有男友下廚，故遲遲未學。此外，有雜誌指蔡卓妍（阿Sa）向鄭中基「逼婚」，鄭中基說並無其事，問他是否想娶阿Sa？他說：「我唔答你呢個問題。」
文：影視組