踏入入行第十個年頭，貴為樂壇天后的容祖兒，其唱片早已是銷量保證，能成為「賣碟天后」最主要是祖兒一直堅持自己唱歌原則，不容交行貨令歌迷耳朵受害，希望每首歌都能引起歌迷共鳴。
祖兒新碟《A Time For Us》推出不足一周已獲白金銷量，雖然不少人批評香港樂壇情歌氾濫，祖兒卻有不同看法：「上張唱片我做咗好多非情歌，今次還原基本步，唱番多啲情歌。情歌最能緊貼每個人嘅情感，容易引起共鳴。」
與名監製合作
今次祖兒首度與名監製梁榮駿合作，新作包括《搜神記》、《可歌可泣》及《心賊難防》，祖兒坦言：「問過同梁榮駿合作過嘅陳奕迅同謝安琪，想了解梁榮駿多啲，等自己唔會太陌生而緊張。其實我恨同梁榮駿合作好耐，估唔到今次公司提議搵佢監製幾首歌，仲超支都冇問題。我覺得榮幸之餘，又試到新嘢，仲有新鮮感畀到歌迷，真係好開心。」
不過，近期忙於宣傳新碟及做巡迴演唱會，令祖兒忙得透不過氣，上月更發生一件令她傷心的事，祖兒愛貓「小丙」，在她舉行新加坡演唱會時，因心臟病逝世，當時祖兒弟弟怕影響她演出，待個唱後才敢通知她，對此祖兒心痛說：「細佬發現小丙唔舒服，送咗佢去診所，打咗針見佢好番啲以為冇事，點知第二日都係救唔番。」祖兒未能見小丙最後一面，但返港後即親自辦理小丙的身後事，並送小丙最後一程。
一放鬆即中招
此外，祖兒昨接受查小欣電話訪問，祖兒雖病到聲沙兼喉嚨痛，但仍笑說：「病徵唔係嗰隻（豬流感），只係出碟後成個人放鬆，病菌入侵，係出碟流感。」祖兒還踢爆蔡卓妍（阿Sa）新唱片銷量好，她終於放下心頭大石：「阿Sa開心晒，之前見佢緊張到兩手揸咪，手都震晒。」
採訪：音樂組