羅家英和汪明荃（阿姐）正在拉斯維加斯享受新婚生活，阿姐坦言怕自己臨時變卦，才將婚訊高度保密；而家英哥就大爆老婆開心到暈，還說婚禮埋單唔使二千蚊！
阿姐和家英哥結束愛情長跑，於5月2日在拉斯維加斯註冊結婚，昨日家英哥接受本報電話訪問，終於抱得阿姐歸的他，情不自禁說：「好開心，阿姐都開心到暈，依家佢去咗睇百老匯歌舞劇，我就留喺酒店休息。（有冇送禮畀阿姐？）冇，等佢自己買。」
考慮領養BB
問婚禮花費多少？家英哥說：「唔使二千港幣，有十幾位朋友觀禮，冇長輩，今次結婚撞正美國同香港股市大旺，好開心。（返嚟會唔會大排筵席？）睇阿姐決定，不過自己要返大陸拍劇，機會好微。（會唔會領養BB？）未諗，可以商量。」
阿姐就接受《巴巴閉邊個夠我查篤撐》節目電話訪問，主持查小欣問是否可以改口叫羅太？阿姐嬌嗲說：「OK啦。（點求婚？）冇乜求唔求婚，大家傾過，今次順便嚟呢度做嘢，親友又喺呢度，咪做呢件事。（結婚相好靚？）羅家英好開心，我好平靜。（5月2日註冊？）係呀，我哋唔知係佛誕，冇特登揀呢日。」
問點解將婚訊保密？阿姐坦言：「驚自己臨時變卦，擔心㗎，唔知搞唔搞呢件事。（有冇鑽戒求婚？）初時諗住冇，係普通戒指，佢戴咗一隻，我叫佢唔好戴，唔好講住，費事朋友問，嗰日戴完除咗擺喺保險箱，本來諗住返香港先正式公布，但有啲朋友喺度，不如由無綫宣布。」
明年補度蜜月
阿姐謂返港後不會擺酒，費事勞師動眾：「嚟呢度舉行婚禮私人啲，細佬做見證人。（有冇開心到喊？）咁又冇，佢都冇，但覺得佢好興奮，睇相都知，好開心。」正在享受新婚生活的他們，昨日打高爾夫球玩樂，問會否度蜜月？阿姐說：「明年，今年好忙，5月又要拍劇。（做咗羅太會唔會減少工作？）唔會，繼續做嘢。」查小欣則透露阿姐穿着的旗袍是用LV絲巾改製，布碎就做埋頭箍和家英哥的蝴蝶結，指這張結婚相獨一無二，不用再影婚紗相。
文：音樂組