徐淑敏（Suki）去年與男友黃重生甩拖，雖然身邊不乏追求者，但真命天子卻未出現，Suki接受專訪時指，有相士批她今年姻緣未到，Suki索性決定今年首要目標是置業，愛情暫且拋諸腦後。
相信風水命理的Suki，新年期間也有睇相問前程，Suki透露有師傅指她今年旺財，大有機會置業，可是感情方面卻姻緣未到。
準備出書
對於被指姻緣未到，Suki坦言未感失望，認為緣分要來就來，亦不心急拍拖，正好趁感情空白期寄情工作，專心搵銀，她說：「好開心聽到師傅話我今年會買樓，自己恨做業主好耐，反而有冇拖拍都冇所謂。」
近期忙於為無綫拍攝節目《咁至識食》的Suki，對烹飪興趣亦大增，出過西餅書的Suki，近日趁空閒經常蒲街市，以及在廚房埋頭苦幹炮製中西美食，每隔兩、三日就會邀請友人到家中試菜。Suki說：「拍攝節目之後對煮中、西菜式興趣大咗好多，依家好努力研究，希望遲啲可以出本烹飪書，同大家分享吓自己嘅興趣。」
最愛煮飯
問入得廚房的Suki可會特別要求另一半也是同道中人？她說：「當然識煮就最好啦，多啲話題嘛，同埋藝人又唔可以周圍去，拍拖煮吓飯仔都好溫馨。不過，如果唔識煮咪我煮囉。」
採訪：影視組 攝影：馬永堅
場地：Fat Angelo's 服裝：Max & Co