郭政鴻醉心武術，無人不知，他硬橋硬馬的功夫形象，觀眾可以想像得到，不過，鴻仔原來亦玩得一手高深莫測的魔術，用來冧女的確奏效，難怪他能和緋聞女友滕麗名擦出火花。
魔術雖非鴻仔的個人嗜好，但為了令《桌球天王》中所演的角色更具特色，他決定向監製提出意見，並於開劇前自費了五千多元，買來魔術道具，實行閉關苦練兩個月，終於在拍攝時大派用場。
嘆為觀止
當鴻仔在拍攝時使出其「絕招」時，在場的工作人員無不嘆為觀止，就連其緋聞女友滕麗名也為之O嘴；其中最出神入化的，是鴻仔施展凌空玩撲克牌，據知阿滕當時即報以崇拜的目光。難怪有說男士只要有一技之長便可冧女，更何況鴻仔不止「一技」，還有桌球、功夫……
增值出位
鴻仔表示：「匿埋練時都好辛苦㗎！錢就使咗，又唔知效果會點，因為我都係想幫個角色玩啲嘢。之前我喺其他劇入面試過啲幾特別嘅造型，無論正、反派，乸型都試過，今次喺《桌》劇中要同秋官（鄭少秋）合作，面對重量級前輩，梗要自我增值一下，冇啲古靈精怪點出位呀？好彩出嚟效果都好好，同阿滕開工時，的確氹得佢好開心㗎！自己亦有好大滿足感。」
文：影視組 攝：黎志輝 場地：Misto Restaurant