梁嘉琪笑言《學警狙擊》雖然一早播完，但現在出街時，有很多人都叫她的劇中名「藥煲」，她自言非常受落：「叫我『藥煲』仲開心，證明有人留意我演出！」
她又透露早前的假期過得十分有意義，因她當了義工，與低收入家庭的小朋友一同玩遊戲，她說：「雖然我做唔到啲咩，淨係同佢哋玩，但啲小朋友好開心，因為佢哋父母成日要開工，好少陪到佢哋。」當中最令嘉琪感動的，是活動後小朋友都送上當日製作的禮物給她作紀念。雖然嘉琪十分鍾意小朋友，但她自言未有心理準備有小孩：「生BB好大責任，仲未準備好，依家都係玩朋友啲細路開心啲！」