錢嘉樂、李珊珊已分手兩年，現與湯盈盈的緋聞傳得甚囂塵上，原來嘉樂仔仍心繫珊珊，前晚首度剖白與舊愛由相愛到分手，雖然緣盡，他仍不時會想起珊珊，對盈盈的關係反而有所保留的說：「還有待觀察。」
前晚嘉樂接受電台節目《嘩！嘩！嘩！打到嚟2009》訪問，主持吳君如甫開場即笑他為情聖，又以「八年抗戰」形容他與舊女友李珊珊的八年戀情，未知是否觸及「要害」，平日愛搗蛋的嘉樂即時變得認真，承認拍劇集《烈火雄心》撻着至感情慢慢萌芽，惜最終分手。
相處不來致分手
他說：「同珊珊相戀八年係我愛情史上最長嘅一次，分手因為相處唔到，緣盡囉！其實隨住年紀唔同，以前係演員，依家多做幕後，又唔係成日傾偈，女仔要有安全感，兩個人有自己世界，需要嘢都唔同咗。（咁致命傷係咩？）時間，珊珊要我多啲理佢，但我唔得，分開咗有試過想喺番一齊，但都係相處唔到。（分手係咪好傷心？有冇影響之後嘅感情？）之後冇乜，好在一直有嘢做分散到精神，但間唔中睇到啲嘢都會『夭』吓你咁。」
嘉樂說分手初期以為雙方只是一時之氣，沒料到最終也沒有轉機，實在可惜，問到與盈盈有否發展前景？他抵死地說：「要宏觀吓先。（未肯定？）法律上係，我交咗畀律師處理啦！」
盈盈情挑魯文傑
雖然未被嘉樂承認身份，盈盈卻無暇理會，昨日與魯文傑繼續為舞台劇《看更》綵排，排練一段文傑幻想出來的艷舞場面，手拿絲巾及雞毛掃的盈盈，在文傑面前不斷擺動身體，騷味十足，當中有部分動作意識十分大膽。事後盈盈笑言排練了兩個月，起初對該場舞蹈有點擔心，幸好慢慢適應下來，至今自信心大增。談到因醉駕被判社會服務令，至今她只履行了一次，是否感辛苦？她說：「係懲罰唔可以話辛苦，自己做錯事就要承擔。」 文：影視組