先達手機店：中港同首發難炒起
【本報訊】蘋果手機iPhone 7及iPhone 7 Plus今日開始預訂，香港及中國內地均列入首發地區。不少炒家準備就緒入貨，但今次會否出現炒燶危機？有旺角先達手機店指，由於內地同時列入首發點，故預計炒價水位較微，但新推出的亮黑色仍「炒得起」，首日拎貨預計有一千多港元水位賺，其他顏色料只有數百港元，炒得起的時間亦較短暫，但實際亦需視乎出貨量。
「大陸自己都有啦」
旺角先達廣場手機店G-World Mobile負責人劉志剛表示，中港兩邊同時列為首發地區，預計只有輕微炒位，首日出貨預計有千多港元，但炒期料只能維持兩星期，「6s都係得兩星期，而且大陸自己都有啦！」他指暫時亦有客人查詢，但未有付款落訂情況。
先達的i世代電訊經理姚進亦預計，首日會有千多港元的水位，但限於新推出的亮黑色，其他顏色則只有數百港元水位，而首批出貨期過後，是否仍炒得起需視乎出貨量。
新一代Apple Watch 2明日亦接受預訂，姚認為難以評論是否炒得起，「第一代大家估佢炒唔起，但最後又炒到一倍，真係要睇出貨量」；劉志剛則認為無得炒，「第一代都唔係咁受歡迎，第二代相信都係麻麻」。