癌藥昂貴 光叔盼援手續命
自醫管局於○五年推出藥物名冊後，基層人士即面對「有藥冇錢買」命運，簡銳光對此最有深切領會。光叔五年前確診患上神經內分泌瘤，自費藥物成治療唯一希望，可惜光叔辛勞半生苦無積蓄，無法每月購買逾萬元藥物續命。在東方日報慈善基金協助下，光叔先後籌得逾十八萬元善款，惟因藥費高昂幾已耗盡，亟待善長繼續施援，免陷斷藥困境。
「如果唔係有善長幫手，我諗我都冇可能生存到今日！」談及善長年來的支持，六十二歲的光叔難掩感激之情。光叔患病前為的士司機，多年來「日踩夜踩」，為的只是讓家人過着安穩的生活。事實上，在妻女眼中，光叔絕對是個「顧家好男人」，每月辛勞所得皆悉數用以養妻活兒，「我廿二歲就結婚，四十年嚟同老婆一路都係咁恩愛，個女又咁孝順，真係幾辛苦都值得！」
然而，二十多年披星戴月的的士司機生涯，終令光叔健康受損，「以前揸的士為咗搵多啲錢，好多時都會一次過頂兩更，又成日捱通宵更，結果就捱出個病嚟……」光叔指患病後身體情況每況愈下，但卻從未氣餒，除了與生性樂觀有關外，最大動力無疑來自妻女的傾力支持。即使現需要長居療養院，光叔依然堅持學習新事物，把握與家人溝通的機會，「啱啱學識用部新手機，每次喺錄音短訊度聽到老婆同阿女把聲，就好似喺我身邊同我傾偈咁，真係好想有多啲時間可以陪佢哋。」
無力工作 妻重投職場養家
親人的支持固然重要，但要控制頑疾，合適的藥物與治療亦是關鍵。不過，自病發後光叔已無法工作，妻子更需重投職場，當兼職以幫補家計，至於女兒則因收入亦有限，無法應付高昂藥費。基金為光叔籌得的十八萬多元善款至今已幾近耗盡，光叔希望善長能繼續伸出援手，「依家嘅時間係咁多位善長送畀我嘅，但如果冇藥嘅話，我好可能永遠都見唔到老婆同阿女。」
醫管局發言人證實，病人於去年一月曾接受電腦掃描，顯示癌症已擴散至肺部及肝臟，而在今年三月覆診後，病人獲醫生處方Sandostatin LAR自費針藥，每針需費一萬三千六十四元。
捐款編號︰12321
記者︰呂耀焜、何穎賢