關愛長者送手機贈月費

「關愛老友記手機及月費捐贈計劃」去年甫推出便「超額申請」，一百個名額旋即額滿。和記電訊體恤長者需要，決定在未來一年繼續豁免月費，讓長者可安心使用服務。提供免費服務之餘，和記電訊日前更派出多名義工，到訪其中一個受惠機構，向受惠長者收集使用「老友記」手機意見。當即場公布免費續約一年消息時，在場長者雀躍萬分。和記電訊亦會陸續發信予其他受惠長者，解釋續約詳情。

七十九歲的謝美容為「老友記」手機受惠長者之一，本身患有糖尿病及血壓高的謝婆婆指出，自子女長大並成家立室後，便一直與老伴互相扶持度日，談及老友記手機令家人的聯絡及溝通更為密切時，謝婆婆的手機竟突然響起，隨即引來哄堂一笑。婆婆接聽後，即說：「係個囡打嚟㗎，以前自己落街買菜買耐咗個囡都好擔心，依家有部手機，出去耐啲佢哋都搵到我！」

延長一年月費豁免

「我就唔同，中心如果需要我做義工，依家就可以即刻聯絡到我，唔好睇我退咗休，仲有好多人需要我㗎！」六十五歲的梁永堅不讓謝婆婆搶去風頭，立即搶白表達一番。

一直在區內提供隱蔽長者及外展服務的嗇色園主辦可頤耆英鄰舍中心為計劃受惠機構之一，該中心社工練永基指出，受惠長者均來自基層，倘要每月支付手機月費，將大大加重生活擔子。

對於和記電訊延長一年手機月費豁免，練永基坦言可以直接紓緩長者負擔，「老友記手機除咗係一部電話，佢本身嘅裝置亦有求救功能，唔單止可以保障長者嘅安全，亦方便佢哋擴闊社交圈子！」

長者齊讚好 王婆婆：「我自己一個人住，行出行入去街市買嘢都冇人陪，依家有部手機，好似多個人照應！」

李伯：「我鍾意部手機後面有個緊急掣，有咩事㩒一下就有人知，仲會自動幫我打電話畀屋企人添！」

記者 梅可茵、攝影：馮國豪