古代催情偏方有好多，其中就有呢道因人氣電視劇《甄嬛傳》而為人所認識嘅「息肌丸」，甚至喺網上流傳相關材料及製作方法，不過現實中係咪真係有呢道藥方呢？
雖然「息肌丸」有個丸字，但其實佢並非服用，而係將粒丸塞喺肚臍融化到體內。據稱當年趙飛燕及細妹趙合德為迷倒漢成帝，於是利用江都王姬李陽華傳畀佢哋嘅「息肌丸」，吸引漢成帝對佢哋夜夜寵幸。有傳本來每次使用一粒，但係佢哋為咗增強藥效，於是一次過使用7粒，甚至10粒！
雖然趙氏姐妹深得漢成帝歡心，但係呢道「息肌丸」藥方卻已經失傳，及至有盜墓者偷挖佢哋嘅墳墓時，報稱獲得「息肌丸」配方，卻因時代久遠而風化，只知基本材料有麝香。
據稱「息肌丸」具有可使面色嬌嫩，下體盈實，及透過香氣刺激男性性慾等功效。不過有中醫師表示如果長期使用坊間流傳嘅藥方，會有破壞子宮、絕經及無法生育等副作用，因此大家咪亂試呀！