講起牛，好多人都會諗起大力、強壯，而牛鞭更具有補腎壯陽嘅功效，但勢估唔到，同牛冇乜關連嘅「懷牛膝」都係男士嘅補身佳品！
懷牛膝又叫塗牛膝、野牛膝，係莧科多年生草本植物懷牛膝嘅根，特點係條子粗壯、色澤鮮艷、油性多，主要產地為河南。
喺中醫學角度，懷牛膝味苦、甘、酸，性平，歸肝、腎經，具有補肝腎、強筋骨、活血通經、利水通淋等功效，係中藥方劑常用通絡活血藥物之一，相傳李時珍講過懷牛膝「滋補之功，如牛之力」。而根據《本草綱目》嘅記載：「牛膝乃足厥陰、少陰藥。所主之病，大抵得酒則能補肝腎，生用則能去惡血。」
1.治療肝腎虧虛、腰痛膝軟者，可配搭杜仲、續斷、熟地等補肝腎藥同用。
2.應對水腫、小便不利等症者，可配搭冬葵子、瞿麥、滑石等使用。
懷牛膝嘅活血功能好強，所以孕婦、月經過多者禁用；另外，長期腹瀉、腸胃功能差嘅人亦不能用，男性遺精者同樣唔適用。