古代中國男人係點樣治療陽痿呢？喺明代就相當流行服用「十精丸」，不過佢嘅做法有好多，而且各有不同，如岳甫嘉所著嘅《醫學正印》指出，「十精丸」嘅材料分別有鹿茸45克，肉蓯蓉、鐘乳粉、續斷、桑螵蛸及熟地黃各30克，仲有蛇床子、遠志及薯蕷各22.5克。做法係先將鹿茸去毛，炙至微黃；肉蓯蓉則用酒浸一晚後，刮去皺皮並炙乾；將所有材料搗碎並撈勻成粉末，每次服6克，用溫酒開服，據稱具有補腎壯陽固澀嘅作用。
另外，萬表所撰嘅《萬氏濟世良方》中稱，「十精丸」嘅材料分別有枸杞子、甘菊及菟絲子各60克，山茱萸、天門冬及白茯苓各90克，熟地120克，肉蓯蓉45克，官桂及漢椒各30克。做法係先將菟絲子用酒煮並搗成餅，山茱萸去核，熟地用酒蒸9次，而肉蓯蓉用酒洗去鱗膜後再浸一晚；將所有材料烘乾並碾成末，再搓成丸狀，每次服用30粒，據稱具有填精助陽，尤其對精寒陽痿者效果更佳。