中國人補身除咗會講究以形補形，亦會睇吓食材夠唔夠生猛，好似鮮蝦咁，一上水就紮紮跳，因而被視為補身良品，至於同樣生猛扭身扭勢嘅黃鱔，對男人一樣有益！佢別名叫黃鱣、鱣魚、海蛇，性溫、味甘，入肝、脾、腎經，功效益氣血、補肝腎、強筋骨、祛風濕，從中醫角度可主治虛勞、陽痿、腰膝痠軟，而專家更話有助提高精子質量，係男性嘅補腎壯陽食品之一，可以提高性能力。
其實黃鱔對男女老幼都有補益效果，皆因佢相當有營養，每100克鱔魚肉含有蛋白質18.8克、鈣質38毫克、磷150毫克、鐵1.6毫克，亦含有維他命B、B1、維他命C，仲有豐富嘅維他命A，可以增進視力，促進眼睛皮膜嘅新陳代謝。此外，含有豐富嘅DHA及卵磷脂，兩種都係構成人體各器官組織細胞膜嘅主要成分，更加係腦細胞不可缺少嘅營養，有補腦嘅功效。