筆者細個嗰陣好奀皮，成日激到阿爸生蝦咁跳，見到阿媽頻頻煮白灼蝦，以為係想「潤」阿爸唔識教仔，但長大之後，先知道呢款餸係有另一種意義，皆因對男人嚟講，蘊含豐富蛋白質、維他命、礦物質嘅蝦，係增強床上表現嘅良品！事實上，根據中醫學理論，蝦味甘，性溫，可補腎壯陽、養血固精、化瘀解毒、益氣滋陽、開胃化痰、延緩衰老，而中醫藥典籍《綱目拾遺》更寫到明「補腎興陽」呢！
方案1：米酒炒海蝦
呢個方案源於《本草綱目拾遺》，適用於腎氣虛弱、陽痿等問題，做法簡單，將海蝦100g浸酒後食用，當然，食生蝦有衞生風險，不妨略加食油和鹽，炒熟先食。
方案2：韭菜炒鮮蝦
河蝦、韭菜都能補腎壯陽，兩者並用，可以令效果加強，適用於腎虛、陽痿、遺精、遺尿、腰腳無力等。做法係以韭菜150g同鮮河蝦240g，加適量食油、食鹽炒熟，即可食用。
方案3：調製蝦蚧散
源於《本草綱目》，當中選用的蝦米、蛤蚧，都屬於補陽食材，加埋小茴香同花椒，有助溫腎補陽，適用於腎陽不足、陽痿精少。做法是先預備蝦米500g、蛤蚧1對、小茴香60g、花椒60g、食鹽10g，再加白酒200ml，炒至香脆，並磨為細末。每日2次，每次服1匙，並以溫水送服。
雖然蝦嘅營養豐富又有補益效果，但不能過量食用，亦要避免同含鞣酸嘅水果一齊食，好似葡萄、石榴、山楂、柿子等，否則會刺激腸胃，令人產生不適，可出現嘔吐、頭暈、惡心、腹痛、腹瀉等症狀。