現時好多季節限定嘅食材幾乎已經變到四季可嘗，就好似栗子咁，以前喺秋冬天當造時先會食，但係家陣幾時都可以喺街市買到，以栗子蓉製作嘅甜品更隨時可以食到。原來栗子係男人嘅補腎佳品，更有「腎之果」之稱，從中醫藥學說及現代營養學上，栗子對補腎亦相當有功效。
栗子為殼斗科植物栗嘅種仁，性溫，味甘平，主益氣，厚腸胃，補腎氣。咁腎氣充足，喺床上自然雄風強勁啦！而且仲有活血止血功效。
栗子含有豐富不飽和脂肪酸以及多種維他命同礦物質，能夠有效地預防高血壓、動脈硬化、冠心病等心血管問題。
好多人都估唔到，栗子原來含有豐富嘅維他命C，有助於預防骨質疏鬆，腰腿痠軟，筋骨疼痛、乏力等，更加有助延緩人體衰老，可以話係中老年人嘅保健佳品。
栗子營養相當豐富，每100克栗子就含有5.7克蛋白質、40至45克碳水化合物，以及25克澱粉。另外，仲含有豐富嘅鈣、磷、鐵、鉀、胡蘿蔔素、維他命B雜等。不過，由於栗子含有嘅糖類成分不低，所以食栗子進補嘅時候，要避免食用過量，以免影響血糖穩定。而且，栗子「生極難化，熟易滯氣」，所以脾胃虛弱、消化不良嘅朋友，不宜多吃。