鹿茸係名貴滋補嘅藥材，更加係男士進補壯陽嘅佳品。鹿茸係雄鹿未長成硬骨時帶茸毛、含血液嘅嫩角，如果生長成為硬角則療效大減。產地方面，中國每年都出產好多鹿茸，而新西蘭係世界最大嘅鹿茸生產國。其味甘、鹹，性溫，歸腎、肝經，功效包括壯腎陽、益精血、強筋骨。
可以增加血漿睾酮濃度及黃體生成素（LH）濃度，提升性功能，對壯老年期嘅前列腺萎縮症治療亦有幫助。
具有抗疲勞功效，同時可以增強身體耐寒能力，更有助加速創傷愈合及刺激腎上腺皮質功能。
喺試驗中，以鹿茸酊作皮下注射，幾日之後雄性動物嘅前列腺同精囊重量有所增加。
好多中醫藥經典都有記載鹿茸嘅補益功效，如《本草綱目》記載：「生精補髓，養血益陽，強健筋骨。治一切虛損，耳聾目暗，眩暈虛痢。」《藥性論》指：「主補男子腰腎虛冷，腳膝無力，夢交，精溢自出，女人崩中漏血，炙末空心溫酒服方寸匕。又主赤白帶下，入散用。」而鹿茸除咗可以用嚟燉製補湯之外，亦會製成增強性機能嘅營養補充品，另外亦會製成具補血益精功用嘅鹿角膠。